بسم الله
Subh Bakhair .
Mere alarm ne wafadari nibhate hoye, kaan ke kareeb ghanti bajai.
Aur kamal hi hogaya, ke mai uth bhi gai. Karwat le ker jab ird gird dekha, tou shuker hai khuda ka sab wesa hi tha jese pichli raat chora tha. Daayen janib, aik nai abottabadi saheli. Baayen janib, zaati reliable pyari Ammi.
Hunza main meri pehli subha, bilkul ese hi thi jese bachpan mai agle din eid ki khushi. Isi khushi ke maaray sari raat neend nahi ati thi. ‘Ammi thora aur khel lun bas?’
‘Ammi , please, thora aur naaye joote dekh lun bas?’ yahan tak ke thora aur thora aur kerte kerte, joote sath rakh ke sonay ki nobat aa jati thi. Sirf agle din ki khushi ki khatir.
Mere liye Cafe De Pamir mai, naaye joote tou nahi thay. Kyun ke wo mai Gilgit ki mitti zadda road pe already tor chuki thi. Likin us waqt, Hunza mai, naaya din mera muntzair zaror tha. Alhamdulillah. Aur isi khushi mai, mai ye bilkul bhool chuki thi, theek bachpan ki terhan ke meri neend poori nahi hui. Saath hi saath jism mai 24 ghanton ke safar ki badolat, dard naak khaliyaan bhi theen. Esi khalliyan ke jis ke baray mai ager mai eik poora mazmoon likhna chahun, tou likh sakti hun. Likin mai likhungi nahi. Don’t worry. Ek waja tou ye ke 24 ghante bayaan karna asaan nahi. Dosri waja ye ke agay jo hua, wo batanay ki zara mujhe jaldi hai. Utni hi jaldi, jitni jaldi mujhe us roz, wo din shuru kerne ki thi. Nir e haal mu.
Lehaza, khaliyon ko khushi se kabool karte hoye, mei foran se uth khari hui.
Allahu Akbar!
Subha subha uth ke pehla kaam tha bhaag kar khirki pe jana, mu bahir nikalna, aur ird gird ke paharon ko ankhain phar phar ker dekhna. Ye plan maine raat ko hi bana liya tha. Kamrey mai dakhil hote hi, hum teenon kamre ke munfarid nakshay pe khushi ke maaray aik dosarey se takreeban eid hi mill rahe thay. Itni khushi. Itni khushi. Ke hum ne jhatt se samne ki bari bari teen khirkiyon ke neeche lagaye teen farshi bistron pe dairay jama liye. Un khirkiyon se aik bohat bara pahaar aur Hunza waadi ke ghar nazar aarahe thay. Pahar na door tha na kareeb. Subha shaam dhuan dhuan se badal nazar atay thay jese chai ki chenak se nikalti hui steam. Farak sirf itna tha ke chai garam hoti hai. Ye manzar thanda tha.
Kamrey ki daayein janib bhi khirkiyaan theen, jis ki khas baat thi Rakaposhi pahar ka manzar. Ammi hazoor ne Rakaposhi wali side pe sona munasib samjha. Mai darmiyaan mai lait gai, aur Abottabaadi lerki/ safar ki dost, meri doosri janib.
Sab se behtreen jaga hum ne apne bhaari bags ko di. Ankhon ke samne, mu se door. 4 bunker beds per.
Zindagi aik dam haseen thi. Alhamdulillah. Zindagi aj bhi wesi hi haseen hai. Alhamdulillah. Mere zehan mai Cafe De Pamir ka ye manzir ab tak wese ka wesa hi maujood hai. Mujhe lagta hai shayad, mai abhi tak wapis nahi aii. Mai wahin hun. Thanday thanday asmaanon ke neeche, baray baray paharon ke darmiyaan. Jahan din bhi utne hi haseen hain jitni haseen raatain. Aur jahan main ne chand ko bullet speed se pahar ke peeche chupte dekha hai. Sach much. Jese wo bhi, agli subha jeene ki jaldi main ho.
khanumsays.wordpress.com 